Залуусыг эх оронч үзлээр төлөвшүүлэх, эв нэгдэлд  уриалах зорилгоор 3000 залуусын цугларалтыг Орхон аймагт зохион байгуулж байна. Монгол улсад анх удаа болж байгаа энэхүү арга хэмжээ нь “Эх орон дуудаж байна, Хүчээ нэгтгэе”  уриан дор  залуус  нэгдэж байгаагаараа онцлог юм.  Эх орны  түүхээр бахархах, тусгаар тогтнолоо бэхжүүлэх, байгаль орчноо хайрлан хамгаалах, соён гэгээрлийг залуу хойч үедээ төлөвшүүлэн суулгах тиөдийгүй бие бялдрыг хөгжлийг сайжруулах  нь энэхүү арга хэмжээний гол ач холбогдол юм.  Ингэснээр  нийгэмд эерэг зөв хандлагыг бий болгох, эрхэмлэх учиртай үнэт зүйлийг нь залууст таниулна гэж үзжээ.           “Эх орон дуудаж байна, Хүчээ нэгтгэе” цугларалтад Баян-Өндөр, Жаргалант сумын баг тус бүрээс 18-35 насны нийт 3000 залуус хамрагдаж байна. Тэд  цэргийн бэлтгэл сургуулилалт, бэлэн байдлын тактикт бодитоор суралцаж, эх орны үнэ цэнийн талаарх лекц сургалт, тэмцээн уралдаанд оролцож байгаа юм. “Эх орон дуудаж байна, Хүчээ нэгтгэе” цугларалтыг  Халхын голын 1939 оны байлдааны 80 жилийн ойд зориулж Орхон аймгийн Засаг даргын тамгын газар, Цэргийн штаб, Монгол цэргийн нэгдсэн холбоо, Энх “Эрдэнэтийн хөгжил” ТББ санаачлан зохион байгуулж байгаа, түүнчлэн Монгол улсын засгийн газар, батлан хамгаалахын яам, зэвсэгт хүчний жанжин штаб дэмжиж оролцсоноороо онцлог гэдгийг зохион байгуулагчид онцолж байна. Эх оронч үзлээр нэгдсэн залуус 3 өдрийн турш хагас цэрэгжилтийн байдалд цэргийн амьдралд бэлтгэгдэх юм.