"Эрүүл шүд-Эрүүл хүүхэд" хөтөлбөрийн хүрээнд Орхон аймгийн 2300 гаруй хүүхэд эмчилгээнд хамрагджээ

 Монгол Улсын Засгийн газраас “Эрүүл шүд-Эрүүл хүүхэд” үндэсний хөтөлбөр хэрэгжээд  дөрвөн сар болж байна. Хөтөлбөрийн хүрээнд 2-6 насны хүүхдүүдийг хувийн хэвшлийн эмнэлгээр дамжуулан амны хөндийн эрүүл мэндийн долоон төрлийн үйлчилгээг үнэгүй авахаар болсон. Уг хөтөлбөрт Орхон аймгийн хэмжээнд таван хувийн эмнэлэг шалгарсан ба одоогийн байдлаар 2336 хүүхэд эмчлүүлээд байгаа аж. Энэ нийт  хамрагдвал зохих хүүхдүүдийн 22.3 хувийг эзэлж байна. Эмнэлгүүдийн зүгээс эцэг эхчүүдийг эрүүл мэндийн мэдлэгээ дээшлүүлж хүүхдийнхээ амны хөндийн эрүүл ахуйг сайн сахиулан, зориулалтын оо, сойз худалдан авч өгөх, кальциар баялаг бүтээгдэхүүн хэрэглүүлэн чихэрлэг бүтээгдэхүүнээс татгалзахыг зөвлөж байна. Учир нь нийт үзлэгт хамрагдсан хүүхдүүдийн 1740 хүүхэд нь амны хөндийн эмчийн хяналтад идэвхтэй байх шаардлагатай гэж гарчээ. Тодруулбал“Ганшунх”, “Натур мед”, “Хаппи дент”, “Хаш ”, “Эмаль” зэрэг хувийн хэвшлийн таван эмнэлэг амны хөндийн урьдчилан сэргийлэх үзлэг, зөвлөгөө, шүдний цооролт, сувгийн эмчилгээ, эрдэсжүүлэх түрхлэг, хар түрхлэг, холбоос хийх  үйлчилгээг үнэ төлбөргүй үзүүлж байна.