Орхон аймгийн Жаргалант сумын Айрагийн гозгор гэх газраас олдсон Хүннүгийн хожуу үе, Сяньбигийн эхэн үед хамаарах бүлэг дурсгалд малтлага хийх ажлыг 6 дахь жилдээ зохион байгуулж байна. Мэргэжилтнүүд тухайн хэсэгт 105 гаруй булшийг илрүүлснээс нийт 20 булш малтан судлаад буй. Малтлагын ажлыг Орхон аймаг 4 дэх жилдээ санхүүжүүлж байгаа бөгөөд энэ онд 4 булшийг нээн судалж байна. Тус малтлага, судалгааны ажилтай өнөөдөр \/2019:07:31\/ Орхон аймгийн Засаг даргын орлогч С.Батжаргал, А.Түвшинжаргал, аймгийн ИТХ-ын төлөөлөгч Д.Мөнхбат, Д.Эрдэнэбат, Ц.Алтаншагай, Г.Эрдэнэбат  бусад төлөөлөгчид очиж танилцан, зарим тулгамдсан асуудлыг шийдвэрлэлээ. Тухайлбал түүхийн үнэт олдворуудад нарийн стандартын хадгалалт, сэргээн засварлалт нэн чухал бөгөөд малтлагаас гарсан авсны модыг сэргээн засварлах танкны төсөв болох 10 сая төгрөгийг гаргаж өгөхөөр боллоо. Малтлага, судалгааны ажлыг Монголын Үндэсний музейн археологи, малтлагын туршлагатай, томоохон баг хийж байна. Мөн Хятадын ардын их сургуулийн баг, Орхон аймгийн музей хамтран ажиллаж буй. Үүн дотор Орхон аймгийн музейн эрдэм шинжилгээний ажилтан М.Ганцэцэг 3 дахь жилдээ Айрагийн гозгорын малтлага дээр аймгаа төлөөлөн ажиллаж байна Мөн 2017 оноос эхлэн Айрагийн гозгорын малтлагын олдворыг хээрийн нөхцөлд хадгалж, хамгаалах сав, баглаа, боодол хийх сургалтыг 3 дахь жилдээ зохион байгуулж, гарсан олдворыг хээрийн нөхцөлд савлан, Орхон аймгийн музейн сан хөмрөгийг баяжуулж байгаа аж.