Дэлхийн 3 хүн тутмын 1 нь сүрьеэгийн нянгаар халдварлагдсан байна. Эдгээрээс жил тутам 10 орчим сая хүн сүрьеэгээр өвчилдгөөс 2017 онд 6.4 сая тохиолдлыг илрүүлж эмчилгээнд хамруулсан байна. Нийт 6,2 сая буюу 60% нь эрэгтэйчүүд, 3.2 сая буюу 30% эмэгтэйчүүд, 1 сая буюу 10% нь хүүхэд байна. Үүнээс 1,8 сая хүн нас барсан бөгөөд 95% нь бага болон дунд орлоготой улс орнуудад байна. Сүрьеэ өвчин нас баралтын тэргүүлэх 10 шалтгааны нэг болсон хэвээр байна. Түүнчлэн манай улсад анх удаа хийсэн сүрьеэгийн тархалтын судалгаагаар Монгол дахь сүрьеэгийн тархалт ДЭМБ-ын тооцоолж байснаас гурав дахин их, хот, хөдөөгийн сүрьеэгийн тархалт ижил түвшинд байгаа бөгөөд сүрьеэ манай улсад бүртгэгдсэн нийт халдварт өвчний гуравдугаарт орж, нас баралтаар тэргүүлсээр байна. Иймээс сүрьеэгийн өвчлөл тархалтыг бууруулахад хууль, бодлого, стратеги, үндэсний хөтөлбөрийг хэрэгжүүлэх үйл ажиллагааг зохион байгуулахаас гадна сүрьеэтэй тэмцэхэд учирч байгаа саад бэрхшээлийг арилгах талаар анхан болон дунд шатны шийдвэр гаргагч нарт нөлөөлөх, олон талын хамтын ажиллагааг сайжруулах шаардлагатай юм. Эдгээр шалтгаануудад үндэслэн Эрүүл мэндийн газраас сүрьеэ өвчний урьдчилан сэргийлэлт, бодлогын баримт бичгийн хэрэгжилтийг орон нутагт сайжруулахад нийгмийн салбаруудын оролцоо, хамтын ажиллагааг өргөжүүлэх ухуулга нөлөөллийн уулзалтыг зохион байгуулж ялгаварлан гадуурхалтаас сэргийлэх, цаашид анхаарах асуудлыг хэлэлцэх зорилгтоор “Сүрьеэгүй аймаг” ухуулга нөлөөллийн уулзалт, сургалт хэлэлцүүлэг зохион байгуулж байна. Өнөөдөр тус үйл ажиллагааны хүрээнд эмч эмнэлэгийн мэргэжилтнүүдэд зориулсан “Сүрьеэгийн тусламж үйлчилгээний онцлог” сургалт зохион байгуулагдаж байна. Маргааш буюу 2019.06.28-д “Сүрьеэгүй аймаг” ухуулга, нөлөөллийн уулзалт болох бөгөөд уулзалтад аймаг, сумын засаг дарга нар, Боловсрол соёл урлагийн газрын дарга, Эрүүл мэндийн салбарын удирдлагууд оролцож бодлогын түвшинд цаашид авч хэрэгжүүлэх үйл ажиллагаа, тулгамдаж буй асуудал, хэрхэн шийдвэрлэх тухай хэлэлцэх юм.