НҮБ-ын Ерөнхий Ассамблейн 1987 оны арванхоёрдугаар сарын 7-ны өдрийн 42\/112 тоот тогтоолоор жил бүрийн зургаадугаар сарын энэ өдрийг мансууруулах бодисын хэрэглээ, хууль бус эргэлтийн эсрэг олон улсын өдрийг тэмдэглэн өнгөрүүлэх шийдвэр гарсан. Дэлхийд 269 сая гаруй хүн мансууруулах бодис хэрэглэж байгаагаас 11-21 сая нь судсаар хар тамхи хэрэглэгчид гэнэ. Тэдний 6,6 сая нь ХДХВ\/ДОХ-ын халдвартай амьдардаг байна. Манай улс хар тамхи хэрэглэгчийн тоогоороо дэлхийд тэргүүлэгч хоёр улс болох ОХУ, БНХАУ-ын дунд оршиж байгаа нь эрсдэлийг нэмэгдүүлж байна. Монгол Улсын иргэд 2017 онд хар тамхитай холбоотой 117 хэрэгт 275 хүн холбогдож байсан бол 2018 онд 197 гэмт хэрэгт 403 хүн холбогдож гэмт хэргийн гаралт 75 хувиар өсжээ. Мансууруулах бодистой холбоотой асуудлыг шийдвэрлэхэд эрх зүй ба эрүүл мэнд нь нэг зоосны хоёр талтай адил гэдгийг энэ жилийн мансууруулах бодисын хэрэглээ, хууль бус эргэлттэй тэмцэх олон улсын өдрөөр чухалчлан авч үзэж, кампанит ажлын гол сэдвээ болгожээ. “Эрүүл мэндэд эрх зүй” - “Эрх зүйд эрүүл мэнд” гэдэг нь: -Хүн бүрд шаардлагатай эмчилгээг хүртээмжтэй байлгах -Эрүүл мэнд, эрх зүйн талаарх судалгаа шинжилгээнд суурилсан хүн амын мэдлэгийг нэмэгдүүлэх -Мансуурлаас сэргийлэлт, нийгмийн оролцоо, нийгмийн хамгаалал нэгдмэл байх юм. Хувь хүн, төр, хувийн хэвшлийн байгууллагуудыг мансуурлын эсрэг дэлхийн өдрийн кампанит ажлын хүрээнд боловсруулсан дээрх багц мэдээллийг нийтэд түгээхийг НҮБ-ын Мансууруулах бодис, гэмт хэрэгтэй тэмцэх албанаас уриаллаа.