Эрдэнэтэд сайхан зун ирэх нь ээ. Энэ жил хуурайшилт ихтэй хавар эрт эхэлж, удаан үргэлжилсэнтэй холбоотойгоор салхи их, хар цагаан шороо, тоос ихээр босж, Эрдэнэтийнхнийг сандаргаж байсан. Гэвч ойрын өдрүүдэд цаг агаар сэрүүн байгаа ч, хур тунадас орж, газар дэлхий чийг аван, удахгүй цэцэглэн өндийх төлөвтэй болжээ. Таатай байгалийн үзэгдэлд Эрдэнэтийн ард иргэд ч хурмаст тэнгэр, хураа хайрласанд талархаж буй. Тэр дундаа саяхан буюу зуны эхэн сарын шинийн арван нэгний билэгт сайн өдөр Орхон аймгийн удирдлагууд Баян-Өндөр хайрханаа тахисан зан үйлтэй салшгүй холбоотой гэлцэн сүсэглэж байна. Тус тахилгын үеэр Баян-Өндөр хайрханы шүтээн дүр, судрыг бүтээлгэн залахаас гадна 8 тахил, 7 эрдэнийг залж, 4 зүг, 8 зовхист сум харван, аргамаг хүлэг сэтэрлэн, лус савдаг, хайрхайн юугаан арга билэг хослуулан аргадсаны үр шим буйза.