“Улаанбурхан өвчинд цэг тавья” уриан дор нэмэлт дархлаажуулалтын аяныг аймгийн ЭМГ-аас эхлүүллээ. Аян 05 сарын 15-аас 5-р сарын 25 хүртэл үргэлжлэх бөгөөд аймгийн хэмжээнд 10-18 насны 13090 хүүхдийг улаанбурхан, улаануудын эсрэг хавсарсан вакцинаар дархлаажуулах юм. Улаанбурхан улаануудын эсрэг хавсарсан вакцинаар нэмэлтээр дархлаажуулах аяныг аймгийн Засаг Даргын Тамгын газар, Боловсрол Соёл, Урлагийн  газар хамтран зохион байгуулж байна.  Дархлаажуулалтын арга хэмжээг Орхон аймагт өрхийн эрүүл мэндийн төвийн дархлаажуулалтын нэгжүүд дээр хийгдэхээс гадна их дээд сургууль болон МСҮТ, ЕБС сургуулиуд дээр түр цэг байгуулан хийгдэнэ. Мөн алслагдсан багийн иргэд болон, хүүхдүүдэд явуулын цэг очиж вакцин хийх аж Улаанбурхан өвчнөөр хүүхдүүд болон дархлаа султай өвчлөмтгий хүмүүс өвдөх нь элбэг бөгөөд вакцин хийлгэснээр өөрийгөө болон бусдыг аюулаас хамгаалж чадах юм. Иймээс 10-18 насны хүүхдүүдтэй эцэг эх, асран хамгаалагчид хүүхдүүдээ нэмэлт дархлаажуулалтад идэвхтэй хамруулахыг албаныхан уриаллаа. Дэлхий дахинд 2018 онд улаанбурхан өвчний 229068 тохиолдол, 2019 оны эхний 3 сарын байдлаар 112,163 тохиолдол бүртгэгдсэн нь өмнөх оноос 4 дахин их байна. Түүнчлэн Энэтхэг, Тайланд, Филиппин, Украйн улсуудад улаанбурхан өвчин дэгдэлтээр бүртгэгдсэн байгаа бөгөөд болзошгүй дэгдэлтээс урьдчилан сэргийлэх зорилгоор энэхүү аяныг орон даяар хэрэгжүүлж байгаа юм.