Галын аюулгүй байдлаа хангаагүйн улмаас айлын дээвэр шатжээ

Өнөөдөр өглөөний 10 цагийн орчимд Баян-Өндөр сумын Цагаанчулуут багийн нутаг дэвсгэрт оршин суух нэгэн айлын дээвэр шатлаа. Тухайн хашаа байшингийн дээвэр шатаж эхэлмэгц, ойр хавийн иргэд ОБГ-т дуудлага өгч, яаралтай арга хэмжээ авсан байна. Энэ үеэр гэрийн эзэд гадуур явж байжээ.  Албаны хүний мэдээлж буйгаар тус айл дээвэртээ зориулалтын бус материалаар  цахилгаан холболт, монтаж хийсэн нь богино холбоо үүсгэж, улмаар  шаардлага стандартын бус, галын эрчийг нэмэгдүүлэх модны үртэс, кардон цаас гэх мэтээр дээврээ дулаалсан нь шатахад хүргэсэн гэлээ. Мөн хэдхэн минутын хугацаа хэтэрч гал унтраасан бол байшин бүтнээрээ шатаж, доторх ахуйн хийн газын баллон дэлбэрэх аюултай байжээ.   Орхон аймаг Баян-Өндөр сумын гэр хороолол дахь гал унтраах ангид "Тавдугаар сар" гарсанаас хойш өнөөдөр 3 дахь удаагийн галын дуудлага гэлээ. Өмнө нь гарсан гал түймэр нь иргэдийн анхаарал болгоомжгүй байдлаас үүдэлтэй, өнжсөн шар өвсийг хашаандаа шатаасантай холбоотойгоор гал алдах, цахилгааны ил утаснаас богино холболт үүсэх зэрэг нь тус эрдслийг дагуулж байна хэмээн нийт ард иргэдэд санууллаа.