Орхон аймаг 120 гаруй мянга хүн амтай бөгөөд өдөрт нийт 10 тонн мах хэрэглэдэг гэсэн судалгаа бий. Жил бүрийн хаврын улиралд махны эрэлт хэрэгцээ өсөхийн хирээр үнэ өсөх хандлагатай байдаг. Иймд иргэдийн махны хэрэгцээг хангах, хаврын улиралд махны үнийг хөөрөгдүүлэхгүйн тулд Орхон аймгийн ЗДТГ “Эрдмит” ХХК-тай гэрээ байгуулж, зах зээлд нийлүүлэгдэх үнийн зөрүүнд 150 сая төгрөг олгож,  үхэр, хонь, ямааны нийт 300 тонн мах нөөцөлж, 3 сараас худалдаанд гаргасан. Гэвч иргэдийн дунд  мах, тэр дундаа нөөцийн махны үнэ тэнгэрт гарлаа гэх  шүүмж гарах болсонтой холбоотойгоор өнөөдөр Орхон аймгийн ЗДТГ-ын дарга Д.Соёлчхүү, хүнс хөдөө аж ахуйн мэргэжилтний хамт нөөцийн мах худалдан борлуулах цэгүүдийн борлуулалттай танилцлаа.  Энэ үеэр Ченжүүдийн намар бэлтгэн хөлдөөсөн махыг иргэд нөөцийн махтай андуурах тохиолдол байгааг мах борлуулагчид хэлж байна. Тодруулбал зах дээр хонины мах 8500-9500, үхрийн шинэ болон ченжүүдийн намар дарж хөлдөөсөн мах 12000 төгрөгийн үнэтэй байна. Гэвч нөөцийн махны үнэ, ястай ясгүйгээсээ хамааран хонины мах 7200-7700, үхрийн мах 7200-10000, ямааны мах 6300 төгрөгийн үнэтэй. Говил багт “Шинэтулга” хүнсний дэлгүүр, Их Залуу багт “Бат буянт орд” хүнсний дэлгүүрээр, хорооллын эцсийн “Хүрэнбулаг” худалдааны төв дотрох лангуу, “Хүлэг” хүнсний зах, “Энх” төвийн нэрийн барааны цэг, 2-28-р байрны Эрдмитийн нэрийн барааны дэлгүүр гэх 6 цэгээр зах зээлийн үнээс кг тутамд 1800-2200 төгрөгөөр хямд, жижиглэнгийн өргөн сонголттой борлуулж буй  нь иргэдийн худалдан авах чадварт нийцдэг гэнэ. Мөн борлуулалт, эрэлт ихтэй. Хамгийн гол нь намар цагт малын тарга хүч сайтайд, эрүүл ахуйн чанар стандартад нийцүүлэн  бэлтгэсэн гэдгээрээ нөөцийн махыг сонгож байгаа иргэд ч  цөөнгүй байна. Өнөөдрийн байдлаар "Эрдмит" ХХК 140 гаруй тн махны нөөцтэй. Энэ нь хүн амын хэрэгцээнд мал тарга хүч авах хүртэл хүрэлцээтэй гэж албаныхан үзэж байна. Харин бусад махны үнэ ханш өндөр байгаа нь "Таван эрдэнэ" захаар орж ирж буй махыг өөр бусад ххк, хувь хүн их хэмжээгээр шууд худалдан авч, махны хомсдол үүсгэж байгаатай холбоотой хэмээн худалдаа эрхлэгчид ярьж байна.