“Эрдэнэт үйлдвэр” ТӨҮГ-ын 2019 оны хэрэгжүүлэх хөрөнгө оруулалт, бүтээн байгуулалтын ажлын нээлтийн үеэр “Москва-300” орон сууцны хорооллын шав тавих ёслол боллоо. “Эрдэнэт үйлдвэр” нийгмийн хариуцлагын хүрээнд “Эко-400”, “Залуус-600”, “Москва-300” буюу нийтдээ 1300 айлын орон сууцны цогцолбор хороолол барихаар төлөвлөсөн бөгөөд ийнхүү эхний хорооллын бүтээн байгуулалтын ажил эхэллээ. Шав тавих ёслолд Эрдэнэт үйлдвэр ТӨҮГ-ын ерөнхий захирал Х.Бадамсүрэн, Орхон аймгийн Засаг даргын орлогч А.Түвшинжаргал, С.Батжаргал болон гүйцэтггэгч компаниудын удирдлагууд оролцлоо.     “Москва-300” хороолол нь тус бүр 50 айлын орон сууц бүхий 10 давхар 6 барилгаас бүрдэх бөгөөд зоорийн давхартай байхаар төлөвлөсөн байна. Мөн нийтийн эзэмшлийн гадна талбайд ногоон байгууламж, автозам, хүүхдийн тоглоомын талбай, ил зогсоол гаргахаар төлөвлөлт хийжээ. Энэхүү орчин үеийн шийдэл бүхий орон сууцны байраар “Эрдэнэт үйлдвэр”-ийн ажилчин, 300 айл өрхийг орон сууцаар хангахаар зорьж байгаа ба сүүлийн жилүүдэд хийгдээгүй томоохон бүтээн байгуулалт гэдгээрээ онцлог юм.     Түүнчлэн хотын дуу чимээнээс хол, эрүүл цэнгэг агаартай орчинд сүндэрлэн босох энэхүү хорооллын оршин суугчид өдөр бүр байгалийн сайханд алхаж, спортоор хичээллэн эрүүл мэнддээ хөрөнгө оруулалт хийх боломжтой болохыг хэлж байсан юм. “Эрдэнэт үйлдвэр”-ийн ажилчдын нийгмийн хамгааллын асуудлыг шийдэхийн зэрэгцээ аймаг, орон нутгийн хөгжилд жинтэй хувь нэмэр оруулах “Москва-300” орон сууцны хорооллын гүйцэтгэгчээр “Неман констракшн, “Химон констракшн”, “Одкон эрчим” компаниуд ажиллаж байгаа аж.