“Хүлэг” хүнсний захын махны тасагт нийт 44 лангуу түрээслэгч мах, махан бүтээгдэхүүн зарж борлуулдаг. Ингэхдээ Эрүүл ахуйн шаардлага хангахааргүй нөхцөлд үйлчилгээ үзүүлж байсан нь иргэдийн шүүмжийг дагуулсаар  байсан юм. Мөн захыг өөр газарт шилжүүлэх талаар ч яригдаж байсан төдийгүй холбогдох хяналтын байгууллага ч стандартад нийцүүлэхийг  удаа дараа шаардаж байсан юм. Тэгвэл тус зах "Махны тасагтаа эрүүл ахуйн стандартыг дагаж мөрдүүлэхээр засвар үйлчилгээгээ эхлүүлээд байна. Тодруулбал нийт 44 м квт шилэн хөргүүртэй лангуу ашиглалтад оруулж, дотоод орчин нөхцлийг сайжруулахаар ажиллаж буйг “Далх бүрэн” ХХК-ийн гүйцэтгэх захирал Н.Болормаа хэллээ. Мөн түрээслэгчдийг хөдөлмөрийн аюулгүй байдлын хувцас хэрэглэгдэхүүнээр бүрэн ижилсүүлэх, тогтмол бээлий, малгай, амны хаалт, ханцуйвч хэрэглүүлж, төлбөрийн баримт олгож занших тал дээр анхаарч буй гэнэ. Засвар энэ сарын 25 наас эхэлсэн бөгөөд төлөвлөгөө ёсоор ирэх тавдугаар сарын нэгэнд үйл ажиллагаагаа хэвийн үргэлжлүүлнэ гэлээ. Засварын хугацаанд худалдан авагч иргэд “Цах маркет” болон бусад махны төрөлжсөн дэлгүүрүүдээс мах худалдан авах юм. Энэ мэт хувийн хэвшлийн ААН-үүд нийгмийн хариуцлагаа ухамсарлаж, орчин нөхцөл, үйлчилгээгээ сайжруулахад анхаарч ажиллавал Эрдэнэт хот хэмээх айлын өнгө сэргэж, иргэд үйлчлүүлэгчид ч соёлжиж, сэтгэл ханамжтай аж төрөх нь дамжиггүй юм.