Газарзүйн шинжлэх ухааныг сонгон. өөрийн мэргэжлээ болгосон багш нар, тус шинжлэх ухааныг сонгон суралцаж буй сурагчдын мэдлэг ухааныг сорисон Газарзүйн улсын 25 дахь удаагийн олимпиад Орхон аймагт 2 дахь удаагаа зохион байгуулагдаж байна. Тус олимпиадад 21 аймаг, нийслэлийн 9 дүүргийн 31 багш, 31 сурагч оролцож байна. Олимпиадыг зохион байгуулахад орон нутгаас дэмжлэг үзүүлж, үр дүнд бусад аймаг орон нутгийн багш сурагчид өөр хоорондоо туршлага солилцох, олимпиад болсон сургуульд нь "Газарзүйн кабинет" тохижуулж үлдээдэг давуу талтай гэдгийг аймгийн Боловсролын газрын дарга хэллээ. Орхон аймгийн Боловсрол, соёл урлагийн газрын дарга Ж.Бат-Амгалан Тус шинжлэх ухааны олимпиадын даалгаварт олон улсын олимпиадын түвшин, шаардлагад нийцүүлэн, газарзүйн үнэлгээний арга, хэлбэрийн талаар олон улсад баримталж буй жишигтэй уялдуулан боловсруулдаг байна. Ингэснээр багш сурагчдын мэдлэгийг шалгах бус газарзүйн зураг, гэрэл зураг, бусад гео дүрслэлийг уншиж, ашиглах, хүснэгтэд мэдээлэл боловсруулах, дүгнэлт гаргах зэрэг дадал, чадварыг шалган, шинжлэн судлах арга барилд суурилсан үнэлгээний хэлбэрийг ашигладгаараа онцлог. Энэ нь олон улсын олимпиадад оролцоход илүү дөхөм болдог байна. Олимпиад сурагчдын хувьд онолын тэмцээн, дадлагын тэмцээний нийлбэр оноогоор, багш нарын ангилалд онолын болон сурган хүмүүжүүлэх ухааны чиглэлээр өгөгдсөн даалгавруудыг гүйцэтгэж дүнгээ гаргана. МУИС-ийн багш, доктор В. Батцэнгэл  Дашрамд дурдахад Орхон аймаг 2016 оноос аймаг орон нутагтаа улсын төрөлжсөн олимпиадад аймгаа төлөөлөн оролцох багш, сурагчдаа олон талаар дэмжин, амжилт гаргасан багш сурагчдыг Засаг даргын нэрэмжит мөнгөн шагналаар  жил бүр шагнаж урамшуулж ирсэн. Үүний үр дүнд 2018 онд Орхон аймгийн сурагчид 5 хичээлийн төрлөөр олон улсын олимпиадад эх орноо төлөөлөн оролцож 2 мөнгө, 3 хүрэл медаль хүртсэн бол, улсын төрөлжсөн олимпиадад 6 сурагч аймгаа төлөөлөн оролцож, 4 мөнгө, 2 хүрэл медаль хүртсэн амжилт гаргаад байгааг олимпиадын нээлтийн үеэр орон нутгийн удирдлагууд онцоллоо.