Засгийн газраас баталсан “Эрүүл шүд-Эрүүл хүүхэд” хөтөлбөр  Орхон аймагт өнөөдөр нээлтээ хийлээ. Одоогийн байдлаар Орхон аймагт нийт 10 эмнэлэг хүүхдийн шүдийг ЭМНД-аас нөхөн олговор татаж үйлчилгээ үзүүлэх шалгуурыг хангасан. Үүний 5 нь холбогдох газартай гэрээ байгуулж, ирэх тавдугаар сарын нэгнээс эмчилгээгээ эхлүүлэхээр болоод байна. Гэрээ ёсоор Хаш, Хaппи дент, Натурмед, Ганшунх, Эмаль гэсэн 5 эмнэлэг үйлчилгээ үзүүлнэ. Ингэхдээ  эхний ээлжинд 2-6 насны хүүхэд нэг удаа хамрагдах, зайлшгүй шаардлагатай тохиолдолд 7-12 насны хүүхэд эмчлүүлэх боломжтой юм. Эмчилгээгээр урьдчилан сэргийлэх үзлэг, зөвлөгөө, шүдний цоорлын эмчилгээ, сувгийн эмчилгээ, урьдчилан сэргийлэх болон эрдэсжүүлэх түрхлэг, цоорол зогсоох түрхлэг, шүд авалт зэрэг тусламж, үйлчилгээг үзүүлж, хүүхдийн амны хөндийг бүрэн эрүүлжүүлнэ. Шүдний эмнэлгийн зүгээс үзлэг, эмчилгээнд хамрагдсан хүүхдийн шүдийг бүрэн эрүүлжүүлэх харин эцэг, эх, асран хамгаалагчийн зүгээс эрүүлжилтийн дараах амны хөндийн эрүүл ахуйг сайтар сахих, зөв дадалд хүүхдээ сургахад анхаарах үүргийг хүлээж, хамтын оролцоотойгоор “Эрүүл шүд-Эрүүл хүүхэд” үндэсний хөтөлбөр хэрэгжинэ гэдгийг холбогдох албаныхан хэлж байна. Монголын хүн ам тэр дундаа хүүхэд, өсвөр үеийн дунд шүдний өвчлөл тулгамдсан асуудал болоод буй. Улсын хэмжээнд шүд цоорох өвчний тархалт 5-6 настай хүүхдийн дунд 94 хувь, 12 настай хүүхдийн дунд 84 хувь байна. Харин Орхон аймгийн хэмжээнд 2-12 насны хүүхдийн шүдний өвчлөл 89-91 хувийн өвчлөлтэй байгааг ЭМГ-аас судлан гаргажээ. Хүүхдийн шүдний цоорол болон эрчим нь чих хамар хоолойн үрэвсэлт өвчнүүд, амь насанд аюултай эрүү нүүрний мэс заслын үрэвсэлт өвчлөлүүдийн шууд шалтгаан болоод зогсохгүй хүүхдийн суурь өвчлөлүүд, амьсгалын замын өвчлөлүүдийн дам шалтгаан болдог байна. Нөгөө талаас шүд цоорох, амны хөндийн эрүүл мэнд нь хоол хүнснээс шууд хамааралтай. Мөн эрүүл зөв хооллолт маш чухал. Шүдний өвчнөөс урьдчилан сэргийлэхийн тулд шүдээ зөв угааж хэвших мөн л чухал. Тиймээс МУЗГ-аас амны хөндийн эрүүл мэндээ иргэд өөрсдөө хянаж, дээшлүүлэх, шүд цоорох өвчнөөс урьдчилан сэргийлэх мэдлэг, дадалтай болгох зорилгоор уг үндэсний хөтөлбөрийг хэрэгжүүлэхээр болжээ