Өнөөдөр хуралдсан аймгийн Засаг даргын зөвлөлийн  хуралд  “Эрдэнэт ШУТП” ОНӨААТҮГ-аас хэрэгжүүлж  буй “Гарааны бизнес 2018” төслийн явцыг  танилцууллаа. ШУТП нь 2018 онд 140 сая төгрөгийн ашигтай ажилласан бөгөөд үүнийг иргэдэд хүүгүй, барьцаагүйгээр олгож бизнес санаа, үйл ажиллагаанд нь хөрөнгө оруулахаар мэдэгдсэн. Энэ хүрээнд өрхийн аж ахуй эрхлэх 19 төсөл, төр, хувийн хэвшлийн хамтарсан үйлдвэр байгуулах 11 төсөл хүлээн авсан гэнэ. Үүнээс орон нутгийн удирдлагуудын зүгээс ХХК байгуулагдаж, ашигаа олж эхэлбэл орон нутагт хамаарагдах 34 хувийн ашигийг иргэдээс санал авч шийдвэрлэх нь зүйтэй. Үүнд иргэдэд хувь хүртээх хэлбэр ч байж болно гэдгийг илэрхийлж байна.  Өөрөөр хэлбэл дэмжих нь зүйтэй гэсэн юм. Цаашид АИТХ-ын тэргүүлэгчдийн хурлаар хэлэлцүүлнэ.“Эрдэнэт Уулын өгөөж” ХХК-ийн төслийг Засаг даргын зөвлөлд танилцуулсан. Тус ХХК нь “Эрдэнэт үйлдвэр” ХХК-ийн хаягдал овоолгыг дахин ашиглах үйлдвэр байгуулах төсал санаачлан боловсруулжээ. Ингэхдээ  100 хувь үндэсний компани байгуулж, 66 хувь нь “Эрдэнэт Уулын өгөөж” ХХК-д, 34 хувь нь “Эрдэнэт ШУТП” буюу орон нутгийн мэдэлд байхаар төлөвлөсөн байна. Ингэснээр ХХК ашиглалтад орсон даруйдаа 100 сая долларыг орон нутагт төвлөрүүлэх боломжтой бөгөөд үүгээр бичил бизнесийг хөгжүүлэх зээлийн сан байгуулж, олон иргэн ажлын байртай, олон бизнесийг бодитойгоор дэмжих боломж бүрдэнэ гэж үзэж байна. Дашрамд дурдахад ШУТП иргэдэд олгох зээлээ 2 хүртэлх сая төгрөгийн хэмжээтэй, эргэн төлөх нөхцөлтэйгээр олгох гэнэ. Энэ нь хүүгүй, барьцаагүй тул иргэдэд  санхүүгийн хувьд хүндрэл учруулахгүй ажээ.  Харин ААН-д 100 хүртэлх сая төгрөгийн зээлийг төр, хувийн хэвшлийн хамтарсан үйлдвэр байгуулах нөхцлийн хүрээнд олгох юм.