13 настай унаач хүүхэд уяачынхаа жүчээнд боомилон нас баржээ
Говь-Алтай аймагт тоглоомын талбай дээр тоглож байсан хүү алга болж, хоёр өдөр эрэн хайсны эцэст гэрийнхээ арын эзэнгүй хашааны дутуу тагтай муу усны нүхэнд унаж харамсалтайгаар амиа алдсныг өчигдөр буюу 29-ны өдрийн 16 цагийн орчимд олсон. Эрэн хайх ажиллагаа хэтэрхий алсын таамаглал, сурагтай байснаас энэ нүхийг шалгаагүй орхисон уу эсвэл...? гэх асуултыг олон хүн одоо хэр тавьсаар Говь-Алтай аймгийн Цагдаагийн газрын албан ёсны мэдээллийг хүлээж байна. Хэрвээ хүү нүхэнд унах үедээ шууд амиа алдаагүй бол, хэрвээ эрлийн ажиллагаа зарим эх сурвалжийн хэлж байгаа шиг буруу мэдээллийн дагуу холын чиглэлд гараагүй бол 6 настай хүүхдийн хувь заяа яасан ч байж болох.
Гэтэл энэ харамсалтай мэдээг залгуулаад Дорнод аймагт морь унаач 13 настай хүүхэд уяачынхаа жүчээнд боомилон нас барсан мэдээ тархлаа. Албаны эх сурвалжаас тодруулбал энэ явдал 27-ны өдөр гарч, дуудлагаар очсон цагдаагийн бие бүрэлдэхүүн хүүгийн хөрсөн цогцосыг буулгасан байна. Хүү нас бараад нэлээд удсан байдалтай байжээ. Дорнод аймгийн Цагаан-Овоо сумын Хүнхэр шанд гэдэг газар нутаглаж байсан уяач С.Ганхуягийнд энэ харамсалтай хэрэг гарсан байна. Хүүхэд ямар нэг сэтгэл санааны дарамт болон хүчирхийллийн улмаас ийм байдалд хүрсэн үү, эсвэл гадны нөлөөтэй үйлдэгдсэн хэрэг үү гэдгийг тухайн аймгийн Цагдаагийн газар шалгаж эхэлжээ.
0
0
0
0
0
0
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ETimes.mn хариуцлага хүлээхгүй.