Хөнгөвчлөх эмчилгээнд хавдрын 3,4р шатны болон бусад эдгэшгүй өвчний оноштой иргэд  хамрагддаг. Тэдний хувьд сэтгэл гутрал, нийгмийн элдэв зүйл, мөнгө санхүүгээс  хамаарсан шаналал, мөн их хэмжээний айдас байдаг гэнэ. Тэр байтугай тухайн өвчтнийг асрах хүнд ч тохиолддог. Өмнө нь Орхон аймгийн БОЭТ-д  хавдрын хөнгөвчлөх эмчилгээг. дотрын тасагт 2 ортойгоор үзүүлдэг байсан.  Энэ 9 сараас эхлэн уламжлалт, хөнгөвчлөх эмчилгээний тасгийг дотоод нөөц боломжоор шинээр нээсэн. Нийт 15 ортой. Үүнээс 6 нь хөнгөвчлөх эмчилгээнд зориулагдсан.  Гэвч  Орхон аймагт 2018 оны хагас жилийн байдлаар хавдрын бүх төрлөөр  926 иргэн хяналтанд байна.  Үүнээс  элэгний хавдар, ходоод, улаан хоолой,умайн хүзүү, өндгөвч, хөхний хорт хавдрууд  тэргүүлж байна. Эдгээрээс 60 хувь нь хожуу үедээ оношлогддог бөгөөд хөнгөвчлөх эмчилгээ нэн шаардлагатай иргэд юм. Өвчтнүүдийн хувьд эмчилгээнд хамрагдах нь азтан болохтой адил. Удаан хүлээсний эцэст  нэг 7 хоног л  хэвтэн эмчлүүлдэг байна. Ард нь өчнөөн оочир дарааллаа хүлээсэн иргэд олон бий гэнэ. Жишээ нь Даваа гаригт хэвтсэн нэг иргэн өнгөрсөн 5дугаар сараас эхлэн ээлж дарааллаа хүлээж байж, сая хэвтэж байна гэж байлаа. Б.МӨНГӨНЧИМЭГ \/БОЭТ-ийн Хөнгөвчлөх уламжлалт тасгийн эрхлэгч, хөнгөвчлөх эмчилгээний их эмч\/                        "Монголчууд төрөлт, хорвоогоос буцагсдад яг ижил хүндэтгэлтэй хандах ёстой. Өөрөөр хэлбэл хөнгөвчлөх эмчилгээг хөгжүүлэх, орны тоо хүрэлцээг илүү нэмэх шаардлагатай. Жишээ нь өндөр хөгжилтэй Америк, Япон, Солонгос  Сингапур зэрэг улсын хувьд  "Хүний амьдарлын чанарыг дээшлүүлэх"-д чиглэж, урлаг соёл шашин, сэтгэл засал гээд цогцоор нь авч үзэн, хөнгөвчлөх эмчилгээ гэдэг. Гэвч манайд оронд тус эмчилгээг үзүүлэх үйлчилгээ дутмаг, хэвтэн эмчлүүлэх орны тоо нь ч асар бага.  Ихэвчлэн мурфен, эмийн эмчилгээ л хийж байна. Хөнгөвчлөх эмчилгээний зарчим нь хэзээ ч хүний үхлийг түргэсэхгүй, сэхээ амьдруулах эмчилгээ хийхгүй гэсэн заалтаар эмчилдэг ч, аль болох гэртээ байгаа юм шиг тав тухтай орчин, сэтгэл санаагаар нь өргөж өгөхийг бид зоридог. Шинээр тасаг байгуулсан нь сайшаалтай ч цаашид тохижилт, эмчилгээний төрөл зүйлд илүү их ач холбогдол  өгөхийн тулд  хичээж ажиллаж байна. Санхүүгийн  боломжгүй тул өвчтнүүдийн ар гэрийнхэн сайн дураараа, нэг өвчтний дуртай нэг цэцэг ч хамаагүй авчирч тохижуулж байна. Цаашид салбар, яамны түвшинд анхаарах цаг нь ирсэн" гэв.