Малын түүхий эд бүтээгдэхүүн, арьс шир, ноос, өлөнгийн үнэ өнөөгийн зах зээлд уналтад ороод буй. Энэ асуудлыг зайлшгүй шийдвэрлэх шаардлагатай тул Орхон аймгийн амьд мал, махны төрөлжсөн зах болох Таван-Эрдэнэ худалдааны төвийн удирдлагын зүгээс, орон нутгаас газар хүсч, дахин өргөтгөл барьж байна. Мөн тус өргөтгөлд арьс шир, өлөнгийн цех ажиллуулах гэнэ .Ингэснээр малын арьс шир, түүхий эдийн анхан шатны боловсруулалт хийхээс гадна орон нутгийн малчдаас ноос худалдан авч, анхны ангилан ялгалтыг хийх, зах зээлд боломжит үнэд хүргэх, малын гаралтай эрсдэлт халдварт өвчнөөс урьдчилан сэргийлэх боломжтой болно. Өөрөөр хэлбэл мал, малын гаралтай түүхий эд, махны худалдааны томоохон хэмжээний цогцолбор байгуулагдана гэсэн үг юм. Дээрх өргөтгөл бүрэн ашиглалатад орсоноор орон нутгийн малчдыг дэмжсэн, нутгийн бизнес эрхлэгчдийн эрх ашигт 100 хувь нийцсэн ажил болно гэж холбогдох албан тушаалтнууд үзэж байгаа юм.  Дашрамд дурдахад 2010 оноос анх Таван-Эрдэнэ худалдааны төвийг амьд малын худалдааг төвлөрүүлэх зорилготойгоор орон нутаг, хувийн хэвшил хоорондын гэрээ хэлэлцээрээр байгуулж байсан. Харин өнөөдрийн байдлаар худалдаа үйлчилгээ тогтворжин, малын гаралтай түүхий эдийг эцсийн бүтээгдэхүүн болгон үйлдвэрлэж, бага оврын махны цех ажиллуулан, амьд малын худалдааг хэвийн ажиллуулж байна.