Орхон аймаг анх удаа орон нутгийн төсвийн хөрөнгөөр 280 хүүхдийн цэцэрлэг барилаа

Эрдэнэт хот үүсэн байгуулагдсанаас хойшхи 42 жилийн хугацаанд түүхэндээ анх удаа орон нутаг өөрийн төсвийн хөрөнгөөр буюу 2,5 тэр бум төгрөгийн хөрөнгө оруулалтаар анхны цэцэрлэгээ барьж байгуулж, хүлээлгэн өгч байна. Бусад аймаг орон нутгуудтай харьцуулахад ч өөрийн хөрөнгөөр барьж ашиглалтад оруулсан анхны тохиолдол гэдгийг онцолж байна. Орон нутгийн ХХК барилгын ажлыг гүйцэтгэж, шинэ цэцэрлэг нээгдсэнээр шинээр 42 ажлын байр бий болж, нийт ажиллагсдын 95 хувь нь хамрах багийн нутагтаа амьдарч байгаа юм. Тус цэцэрлэг хотын төвөөс алслагдсан тойрогт ашиглалтад орсноор хамран сургах тойргууд болох Цагаанчулуут Рашаант Уртын гол багуудын цэцэрлэгийн насны 390 хүүхэд бүртгэгдсэнээс өнөөдрийн байдлаар бага 4, дунд 4, ахлах 2, бэлтгэл2, гээд нийт 12 бүлгийн 252 хүүхэд сурч хөгжиж байна. Эдгээрээс анх удаа цэцэрлэгт явж буй 170 хүүхэд байгаа юм.