Эрдэнэт үйлдвэрийнхэн "Цэцэн бэр"-үүдээ шалгарууллаа

2020-11-05 14:1149

Эрдэнэт үйлдвэрийн Эмэгтэйчүүдийн холбоо, “Эрдэнэт цогцолбор” дээд сургуулийн Хүний хөгжлийн төвөөс хамтран зохион байгуулдаг “Цэцэн бэр” тэмцээнд 24 цех нэгжийн уурхайчин бүсгүйчүүд оюуны хүчээ сорин өрсөлдлөө. 10 дахь жилдээ 11 дэх удаагаа зохион байгуулагдсан тус тэмцээнд Соёл, урлагийн цогцолборын “Одод” баг тэргүүн байрт шалгарч, Спорт цогцолбор, 19-р сургуулийн багууд удааллаа.     

     2011 онд Үндэсний олон нийтийн телевизийн “Элсэн цаг”, Оросын телевизийн “Что, где, когда” нэвтрүүлгээс санаа авч танин мэдэхүйн тэмцээн зохиож эхэлсэн нь өргөжин тэлсээр эдүгээ Эрдэнэт үйлдвэрийн уурхайчин бүсгүйчүүдийн хүсэн хүлээдэг, оролцох дуртай тэмцээний нэг болжээ. Тэмцээнийг Эрдэнэт үйлдвэрийн Эмэгтэйчүүдийн холбооны дарга З.Жаргалмаа, Монгол Улсын гавьяат багш С.Мэнджаргал, “Эрдэнэт цогцолбор” дээд сургуулийн Хүний хөгжлийн төвийн тэргүүлэх багш Ч.Уранчимэг нар шүүж, шилдгүүдийг тодруулсан юм.  

     Энэ жилийн тэмцээнд багийн зохион байгуулалт, имидж бүрдүүлэлтээр “Шилдэг өнгө төрх”-тэй багийг шалгарууллаа. Тус номинацийн шилдгээр шинэ, залуу ажилтнаар багаа бүрдүүлсэн “Эрдэнэт” сувиллын цогцолбор тодорсон. Дэлхий нийтэд тархсан Ковид-19 цар тахлын улмаас Эмэгтэйчүүдийн холбооноос зохион байгуулдаг уламжлалт ажлууд хойшилсон юм. “Цэцэн бэр” тэмцээн энэ оны төлөвлөгөөт ажлын эхлэлийг тавьж байгааг тэмцээний зохион байгуулагчид онцолж байлаа. Энэ үеэр шүүгч, оролцогчийн сэтгэгдлийг хуваалцлаа. 

“Эрдэнэт үйлдвэр” ТӨҮГ-ын Эмэгтэйчүүдийн холбооны тэргүүн З.ЖАРГАЛМАА: 
“ЭНЭ ХҮҮХНҮҮД ҮҮ” ТЭМЦЭЭНИЙГ ЭНЭ САРЫН 11-НД ЗОХИОН БАЙГУУЛАХААР ТӨЛӨВЛӨСӨН

-Эрдэнэт үйлдвэрийн Эмэгтэйчүүдийн холбоо энэ онд ямар ажлууд зохион байгуулахаар төлөвлөсөн бэ?

     -Энэ онд төлөвлөсөн ажлаасаа хамгийн эхэнд “Цэцэн бэр” тэмцээнийг зохион байгууллаа. Тэмцээн сайхан болж байна. Бид энэ онд уламжлал ёсоор Эрдэнэт үйлдвэрийнхээ 15 манлай гэр бүлийг шалгаруулна. Мөн Эмэгтэйчүүдийн холбооноос зохиодог “Энэ хүүхнүүд үү” тэмцээнийг энэ сарын 11-нд Соёл, урлагийн цогцолборт хийхээр төлөвлөсөн. Энэ тэмцээнд соёл урлагаар дамжуулан эмэгтэйчүүд тулгамдсан асуудлаа гаргаж, нийгэмд дуу хоолойгоо хүргэдэг.      

“Эрдэнэт цогцолбор” дээд сургуулийн Хүний хөгжлийн төвийн тэргүүлэх багш Ч.УРАНЧИМЭГ: 
ЖИЛЭЭС ЖИЛД ОРОЛЦОГЧДЫН ТОО НЭМЭГДЭЖ, ТЭМЦЭЭН ЧАНАРЖИЖ БАЙНА

-“Цэцэн бэр” тэмцээнийг анх зохион байгуулахдаа ямар зорилго тавьж байв, өнөөдөр тэр зорилгодоо хүрч чадсан болов уу?

     -Би Технологийн сургуулийнхаа анхан шатны Эмэгтэйчүүдийн зөвлөлийн даргаар сонгогдсоны дараа залуучуудын дунд танин мэдэхүйн тэмцээн явуулъя гэсэн бодол төрсөн. Ингээд Эмэгтэйчүүдийн зөвлөлийн дарга З.Жаргалмаатай ярилцаад “Цэцэн бэр” нэр өгч тэмцээнээ явуулж байлаа. Жилээс жилд оролцогчдын тоо нэмэгдэж, тэмцээн чанаржиж байгаад санаачлагчийн хувьд баяртай байна. Анх залуу үедээ шинжлэх ухааны ололт амжилтуудаас хүргэхийн зэрэгцээ монголын уламжлалт зан заншлыг танин мэдүүлэх зорилготой байсан. Тэр хэрээр мэдлэг нь тэлж байна. Мөн Эрдэнэт үйлдвэрт ажилд орсон залуу ажилтнуудаа оролцуулахыг зорьдог. Энэ зорилгоо биелүүлж байгаа гэж боддог. 

“Эрдэнэт” сувиллын цогцолборын Сэргээн засах эмчилгээний тасгийн Их эмч Б.АЛГИРМАА: 
“ЦЭЦЭН БЭР”-ИЙГ ГЭРГИЙ ХҮН ОЮУН УХААНААРАА ӨРСӨЛДӨХ ТЭМЦЭЭН ГЭЖ ОЙЛГОДОГ

-Тэмцээний талаарх сэтгэгдлээ хуваалцахгүй юу?

-Манай багийнхан “Анагаагч” нэрээр энэ жилийн тэмцээнд оролцож байна. “Цэцэн бэр” тэмцээнийг анх зохиогдсоноос эхлээд өнөөг хүртэл оролцсон. Энэ жилийн хувьд залуучуудаараа баг бүрдүүлж, тэмцээний бэлтгэлээ тодорхой хугацаанд хийсэн. “Цэцэн бэр”-ийг би хувьдаа гэргий хүн оюун ухаанаараа өрсөлдөх тэмцээн гэж ойлгодог.

И.Чинтогтох
Фото: Б.Баттөгс


Сэтгэгдэл

Анхааруулга:


Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна. etimes.mn сайтын редакц