Хөгжлийн бэрхшээлтэй хүний эрхийг хангах зөвлөлийн өргөтгөсөн хуралдаанд Орхон аймаг сайн туршлагаасаа хуваалцлаа

2022-12-01 09:12128

Монгол Улсын Засгийн газар, Хөдөлмөр нийгмийн хамгааллын яамнаас зохион байгуулсан Хөгжлийн бэрхшээлтэй хүний эрхийг хангах зөвлөлийн өргөтгөсөн хуралдаанд Засаг дарга С.Батжаргал цахимаар оролцлоо.  Засгийн газрын 2020 оны 350 дугаар тогтоолоор Хөгжлийн бэрхшээлтэй хүний эрхийг хангах зөвлөлийн бүрэлдэхүүнийг шинэчлэн баталсан. Тус зөвлөлийн даргаар  Монгол Улсын сайд, ЗГХЭГ-ын дарга Д.Амарбаясгалан, дэд даргаар ХНХЯ-ны сайд Т.Аюурсайхан нар ажилладаг.

    Орхон аймаг  Хөгжлийн бэрхшээлтэй хүний эрхийн тухай хууль болон бусад хууль тогтоомжийн хэрэгжилтийг хангах үүднээс  ХБИ-ий эрхийг хангах, салбар дундын үйл ажиллагааг уялдуулан зохицуулах, хэрэгжилтийг нэгдсэн удирдлага чиг үүргээр хангах зорилго бүхий Хөгжлийн бэрхшээлтэй хүний эрхийг хангах орон тооны бус салбар зөвлөлийг  Засаг даргын  орлогч А.Түвшинжаргал ахлан  ажилладаг билээ. 

Монгол Улсын Засгийн газраас халамжаас хөдөлмөрт зорилтын хүрээнд Хөгжлийн бэрхшээлтэй хүн бүр өөрийн мэргэжил, ур чадвартаа тохирсон хөдөлмөр эрхэлж улс орны хөгжилд хувь нэмрээ оруулдаг, баялаг бүтээгч болгоход чиглэсэн бодлогыг баримтлан ажиллаж байна хэмээн Монгол Улсын сайд, ЗГХЭГ-ын дарга Д.Амарбаясгалан илтгэлдээ дурьдав.  Мөн тэрээр, Хөгжлийн бэрхшээлтэй хүний эрхийг хангахад салбар бүрт, төрийн үйлчилгээний нэгжүүдэд тодорхой төсөв баталж  холбогдох үйл ажиллагаанд зарцуулдаг байх хэрэгтэй гэв.  

2022 онд БШУЯ, БХБЯ, Зам тээврийн яамны дэд зөвлөл, Орхон аймгийн салбар зөвлөл Хөгжлийн бэрхшээлтэй иргэний хөгжил оролцоог дэмжих чиглэлээр идэвх санаачилгатай ажиллаж байгаад талархал илэрхийлэв. 

Засаг дарга С.Батжаргал өргөтгөсөн хуралдааны үеэр Монгол Улсдаа сайн жишиг болж,  орон нутагтаа хэрэгжүүлж буй үйл ажиллагааныхаа  туршлагаасаа хуваалцав. 

Орхон аймагт  4216 хөгжлийн бэрхшээлтэй иргэд байгаа нь нийт хүн амын 3,9 хувийг эзэлж байгаа юм.  Хөгжлийн бэрхшээлтэй хүний эрхийн тухай хууль болон бусад холбогдох хууль тогтоомж, дүрэм, журам, бодлогын баримт бичгүүдийн хэрэгжилтийг хангуулж, Засаг даргын 2020-2024 оны үйл ажиллагааны хөтөлбөрт 6 ажил үйлчилгээг тусгасан. 

Засаг дарга С.Батжаргал мэдээлэлдээ.....

  •  Бид ерөнхий боловсролын 7 дугаар сургуулийг түшиглэн тусгай хэрэгцээт боловсрол олгох 4 бүлэгт 6-15 насны 46 хүүхэд суралцаж байна. 
  •  27 цэцэрлэг дээр 2021 оноос эхлэн 2 бүлэг нээн, мэргэжлийн сэргээн засалч эмч ажиллуулж байна. 
  •  Усан бассейн бүхий 7 дугаар цэцэрлэгт мөн 2 бүлэг нээж, усан бассейнаар хүүхдийг сэргээн засах ажлыг эхлүүлэхээр бэлтгэл хангаж байна. 
  •  Хүнд хэлбэрийн хөгжлийн бэрхшээлтэй хүүхдээ асарч буй эцэг, эх асран хамгаалагчдын эрүүл мэнд, нийгмийн даатгалыг 2014 оноос эхлэн 9 дэх жилдээ орон нутгаас санхүүжүүлж, давхардсан тоогоор 871 асран хамгаалагчдад 391 сая төгрөгийг зарцуулсан байна. 
  • Үүний үр дүнд асран хамгаалагчдыг нийгмийн даатгалын сангаас тэтгэвэр тогтоох, эрүүл мэндийн үйлчилгээг бүрэн авах боломжийг бүрдүүлэв. 
  •  Орон нутгийн санхүүжилтээр “Тэгш боломж” төслийг эхлүүлэв. 

Энэ мэтчилэн хийж хэрэгжүүлж буй хүн нэг бүрт хүрсэн, үр дүнгээ өгсөн олон ажил бий. Цаашид салбар дундын уялдаа холбоог илүү сайн хангаж, хийхийг төлөвлөсөн ажил бийг онцолсон. 

12(1)


Сэтгэгдэл

Анхааруулга:


Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна. etimes.mn сайтын редакц