Навальныйд 3.5 жилийн хорих ял оноолоо

2021-02-03 11:0278

ОХУ-ын нийслэл Москва хотын дүүргийн шүүхээс сөрөг хүчний улс төрч Алексей Навальныйд оноосон 3.5 жилийн тэнсэн харгалзах ялыг биеэр хорих ялаар солих шийдвэр гаргалаа. Гэхдээ шүүхээс түүний өмнө нь гэрийн хорионд байсан 11 сарын хугацааг хорих ялд нь багтааж тооцох шийдвэр гаргасан тул Навальный 2 жил 8 сар орчмын хугацаанд хорих ялыг биеэр эдлэхээр болж байна. 

Энэ удаагийн шүүхийн шийдвэрийг эргэн сөхвөл 2014 онд Навальныйг санхүүгийн гэмт хэрэг үйлдсэн гэж үзэж шүүхээс тэнсэн харгалзах ял оноож байсан үйл явдалтай шууд холбогдоно. Харин Навальный өнгөрсөн онд Новичокийн бүлгийн бодист хордож, ХБНГУ-д 5 сар орчмын хугацаанд эмчлүүлснээрээ тэнсэн харгалзах ялын нөхцлийг зөрчсөн гэж үзэж, ОХУ-ын хуулийн байгууллага түүнийг оны өмнөхөн албан ёсоор эрэн сурвалжилж эхэлсэн. 

Улмаар 1 сарын 17-ны өдөр Навальныйг ОХУ-д эргэн ирсэн даруйд нь баривчилсан нь үндэсний хэмжээнд эсэргүүцлийн хөдөлгөөн жагсаал гарахад хүргээд байна. Гэтэл шүүхээс Навальныйгийн тэнсэн харгалзах ялыг хорих ялаар солих шийдвэр гаргаж, Навальный 2 жил 8 сар орчмын хугацаанд торны цаана хоригдох нөхцөл бүрдэж байна. Гэхдээ түүний өмгөөлөгчид шүүхийн шийдвэрийг давж заалдахаа мэдэгдээд байгаа. 

Navalny in a glassed off area of Moscow City Court on Tuesday.

Навальный шүүх хурлын үеэр Ерөнхийлөгч Путин өөрийг нь Оросын түүхэнд төрийн зүтгэлтнийх нь хувьд биш хорт этгээд мэтээр тэмдэглэн үлдээхийг оролдож байна гэж мэдэгдэж харин Ерөнхийлөгч Путиныг өөрийг нь хорт этгээд гэж тодорхойлсон. Түүнчлэн Навальный болон түүний тойрон хүрээлэгчид, дэмжигчдийн хувьд хорих ялыг шууд утгаараа улс төрийн сэдэлтэй гэж тайлбарлаж байна.  Навальныйгийн дэмжигчдийн дунд Ерөнхийлөгч Путиныг илт буруутгах хандлага улам бүр газар авч, Путин Навальныйг хөнөөхийг оролдоод бүтэлгүйтсэн тул одоо улс төрийн эрх чөлөөг хумьж байна гэсэн байр суурь илэрхийлж байна. 

Гэхдээ ЕТГ болон бусад албаны эх сурвалжууд Ерөнхийлөгч Путин Навальныйгийн шүүх үйл явцад хөндлөнгөөс оролцох нь битгий хэл огт ач холбогдол өгөхгүй байгаа гэж мэдэгдэж байгаа. Мэдээж ОХУ-ын хуулийн байгууллагууд Навальныйг шүүх үйл явц хуулийн хүрээнд явагдаж байгаа гэж тайлбарлаж байгаа. Харин нөгөө талаас сөрөг хүчний талынхан шүүхийн бүхий л шийдвэрийг улс төрийн хүчин зүйлтэй буюу эрх баригчид Навальныйгийн дуу хоолойг хорих гэсэн оролдлоготой холбон тайлбарлаж байна.

Шүүх хурлын явцад хурлыг эсэргүүцсэн жагсаал болсон бөгөөд Москва хотод л гэхэд 1,116 хүн саатуулагдсан гэх мэдээлэл байна. Зарим эх сурвалжийн мэдээгээр Навальныйгийн шүүх хурлыг эсэргүүцэн орон даяар зохион байгуулагдсан жагсаал, цуглааны явцад 1,400 гаруй хүн баривчлагдсан гэх мэдээлэл ч байна. Тиймээс Навальныйд хорих ял оноосон нь түүний хувь хүний улс төрийн эрх чөлөөг хязгаарлаж болох ч дэмжигчдийнх нь эсэргүүцлийн хөдөлгөөнийг улам бүр идэвхжүүлэх хандлагатай байна. 

Нөгөө талаасаа энэ шийдвэр дараа дараагийн шатны шүүхээр хэвээр үлдвэл ОХУ болон барууны орнуудын харилцааг улам хурцатгах төлөвтэй байна. Тухайлбал АНУ-ын ТНБД Антони Блинкен л гэхэд ОХУ Навальныйг ямар нэг нөхцөл тавилгүйгээр нэн даруй суллах нь зүйтэй гэсэн байр суурийг илэрхийлээд байгаа. 

Их Британи, Герман, Францын Засгийн газрууд ч үүнтэй төстэй байр суурь баримталж байна. Хэрвээ энэ асуудал цаашид даамжирвал барууны орнууд ОХУ-ын эсрэг хоригоо чангатгах нь цаг хугацааны асуудал болж хувирна. Мөн үүнээс үүдэн ОХУ-ын барууны орнуудтай хамтарсан төслүүд гацаанд орох, тэр дундаа ОХУ-аас ХБНГУ руу чиглэсэн Умардын урсгал 2 байгалийн хийн хоолойн төслийг зогсоох асуудал ч хөндөгдөж байна. 
 


Сэтгэгдэл

Анхааруулга:


Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна. etimes.mn сайтын редакц